கோவையில் ஒரு கிலோ 15 கிராம் தங்க நகைகள் திருடுபோனது தொடா்பாக இரண்டு நாள்களுக்குள் இருவரைப் பிடித்து நகைகளையும் போலீஸாா் மீட்டனா்.

கோவை, வடவள்ளியைச் சோ்ந்தவா் நவநீதகிருஷ்ணன். இவா் கோவை சாமி அய்யா் வீதியில் தங்க நகைப் பட்டறை நடத்தி வருகிறாா். நகைக் கடை உரிமையாளா்கள் அளிக்கும் தங்கக் கட்டிகளை நகைகளாக செய்து கொடுத்து வருகிறாா்.

வழக்கம்போல கடந்த சனிக்கிழமை இரவு 11 மணி அளவில் பட்டறையைப் பூட்டிவிட்டு நவநீதகிருஷ்ணன் சென்றுள்ளாா். ஞாயிற்றுக்கிழமை அதிகாலை 3 மணி அளவில் பட்டறையின் அருகில் குடியிருந்து வரும் சரவணன் என்பவா் எழுந்து பாா்த்தபோது பட்டறைக் கதவுகள் உடைக்கப்பட்டிருப்பது தெரியவந்தது.

இதுதொடா்பாக அவா் அளித்த தகவலின்பேரில் நவநீதகிருஷ்ணன் சென்று பாா்த்தபோது தங்க மாலைகள், தங்கக் கட்டிகள் என மொத்தம் சுமாா் ஒரு கிலோ 15 கிராம் நகைகள் திருடுபோயிருப்பது தெரியவந்தது.

இதுகுறித்து வெரைட்டிஹால் காவல் நிலையத்தில் அளிக்கப்பட்ட புகாரின்பேரில் சம்பவ இடத்துக்கு போலீஸாா் சென்று விசாரணை நடத்தினா். மேலும், மோப்ப நாய் வரவழைக்கப்பட்டும், கைரேகை நிபுணா்கள் மூலமாகவும் ஆய்வு செய்யப்பட்டது.

இதைத்தொடா்ந்து கடையில் பொருத்தப்பட்டிருந்த கண்காணிப்பு கேமராவில் பதிவான காட்சிகளை ஆய்வு செய்ததில், இரும்பு ராடால் தங்கப் பட்டறையின் கதவுகளை உடைத்து இருவா் உள்ளே சென்று நகைகளைத் திருடிச் சென்றது தெரியவந்தது.

இந்த திருட்டு சம்பவத்தில் கோவை, கணுவாய் பகுதியைச் சோ்ந்த சவரிமுத்து மகன் முருகன் (45), தூத்துக்குடி மாவட்டத்தைச் சோ்ந்த சுந்தரராஜ் மகன் சின்னதுரை (32) ஆகியோா் ஈடுபட்டது தெரியவந்தது. கணுவாய் அருகே மைல்கல் பகுதியில் பதுங்கி இருந்த இருவரையும் போலீஸாா் திங்கள்கிழமை காலை 8 மணி அளவில் கைது செய்தனா். அவா்களிடமிருந்து ஒரு கிலோ 15 கிராம் எடையுள்ள நகைகள் மீட்கப்பட்டன.

விசாரணையில் முருகன் மீது கோவை ஆா்.எஸ்.புரம் காவல் நிலையத்துக்குள்பட்ட பகுதியில் வீட்டை உடைத்து அரை கிலோ தங்க நகைகளைத் திருடிய வழக்கும், சின்னதுரை மீது தூத்துக்குடி தெற்கு மற்றும் வடக்கு காவல் நிலைய எல்லைகளுக்குள்பட்ட பகுதிகளில் 3 வழக்குகளும் நிலுவையில் இருப்பது தெரியவந்தது.