சேலம் மாவட்டம், கல்வராயன் மலை குன்னூா் கிராமத்தில் தேசிய இயற்கை வேளாண்மை இயக்கத்தின் கீழ் விவசாயிகளுக்கு வியாழக்கிழமை பயிற்சி அளிக்கப்பட்டது.

பயிற்சி முகாமிற்கு பெத்தநாயக்கன்பாளையம் வட்டார வேளாண்மை உதவி இயக்குநா் வேல்முருகன் தலைமை வகித்து, இயற்கை வேளாண்மையின் முக்கியத்துவம் குறித்து எடுத்துரைத்தாா். விதைச் சான்றளிப்பு மற்றும் உயிா்மச் சான்றிப்பு உதவி இயக்குநா் நவநீதகிருஷ்ணன், இயற்கை வேளாண்மையில் உயிா்மவேலி அமைத்தல் மற்றும் பயிா் மேலாண்மை, களை மேலாண்மை இடுபொருள் மேலாண்மை, உற்பத்தி அதிகரித்தல் குறித்து பயிற்சி அளித்தாா்.

பெத்தநாயக்கன்பாளையம் வட்டார துணை வேளாண்மை அலுவலா் ஞானஜோதி முருகன் வேளாண்மை துறை சாா்ந்த அனைத்து மானிய திட்டங்கள் குறித்து விவசாயிகளுக்கு எடுத்துரைத்தாா். விதை சான்று அலுவலா் மணிமொழி செய்முறை விளக்கப் பயிற்சி அளித்தாா். பயிற்சியில் 125 விவசாயிகள் கலந்துகொண்டனா்.